कुमारी बैंकद्वारा बन्दी सहायता निगम (पाम) का बालबालिकालाई विद्यालय पोशाकका लागि सहयोग

कुमारी बैंकले आफ्नो संस्थागत सामाजिक उत्तरदायित्व (CSR) कार्यक्रम अन्तर्गत बन्दी सहायता निगम (पाम) अन्तर्गत संरक्षणमा रहेका २८ जना बालबालिकाका लागि विद्यालय पोशाक उपलब्ध गराउन सहयोग गरेको छ।

नागरजुन नगरपालिका–१, रानीबन, काठमाडौंस्थित PAM एक गैरनाफामुखी संस्था हो, जसले कारागारमा रहेका व्यक्तिहरूका बालबालिकालाई आवास, शिक्षा, हेरचाह तथा समग्र विकासका अवसर उपलब्ध गराउँदै आएको छ। प्रदान गरिएको सहयोगबाट बाल विकास माध्यमिक विद्यालयमा अध्ययनरत २८ जना बालबालिकाका लागि विद्यालयले हालै लागू गरेको पोशाक मापदण्डअनुसार कोट, सर्ट, पाइन्ट तथा ट्र्याकसुट व्यवस्था गरिनेछ।

यस सहयोगले बालबालिकाको विद्यालय उपस्थितिमा सुधार ल्याउने, उनीहरूको आत्मविश्वास तथा सम्मान अभिवृद्धि गर्ने र विद्यालयमा समावेशी वातावरण निर्माण गर्न योगदान पुर्‍याउने अपेक्षा गरिएको छ। साथै, पोशाकको उपलब्धताले चिसो मौसमबाट संरक्षण प्रदान गर्नुका साथै खेलकुद तथा अतिरिक्त क्रियाकलापमा सहभागिता बढाई बालबालिकाको समग्र विकास र कल्याणमा सकारात्मक प्रभाव पार्ने विश्वास गरिएको छ।